مشروع خطوبة

مرحبا

أنا تعبتك بأحلامي.. يعطيك العافية
بس لأن عندي ثقة بتفسيرك.. و أشكر جهودك

بياناتي مثل ما هي:
أنا مطلقة منذ 7 سنوات تقريبا و عندي بنت بعمر طلاقي و عمري 33 سنة , مسلمة,و كنت أعمل بشكل مؤقت في مدرسة ابنتي(إدارية) أما الآن بدون عمل منذ حوالي شهر.


أنا قمت في الصباح حتى أطلع بنتي لمدرستها و رجعت للنوم عالساعة 9 تقريبا (أول أمس).. بعد ماقرأت أذكار الصباح.. و قرأت قبل النوم .. دعاء الإستخارة من غير ما أصليها ( لأن عندي الدورة الشهرية:من و قبل يوم عرفة بيوم واحد جتني و لين ألحين فيني!) بس كنت حابة أقرأ هذا الدعاء و نمت.

ما أتذكره هو جزء قليل من الحلم .. أنا شعرت بأن الحلم طويل و ملئ بأحداث غريبة .. و لكني بذكر إللي أتذكره و إن شاء الله خير.

أتذكر بأننا رحنا أنا و أهلي إلى التسوق (أنا و أبي و أمي و أختي و إبنتي).. في مركز تجاري ضخم.. - أول مرة أشوف هالمركز في حياتي - .. و كان شبه فاضي.. و إننا نشتري كثير أشياء و في فعاليات مختلفة.. و كان في مغني .. ماعرف منو هو.. بس كانت أمي تقول إنها تحب أغانيه و يعجبها. و رحنا نصعد على السلم المتحرك-بس ما شفت وقت صعدنا.. و أشوف شخص يبيع بلونات ملونه للأطفال.
و بعدها جلسنا أنا و أختي و أمي على طاولة و نتكلم عن المغني إللي أمي معجبة به.. و قالت أمي: أنا كيف آخذ له صورة من قريب؟ .أنا بصراحة ما كنت مهتمة للموضوع.. و أختي شكلها مو عاجبها الموضوع من أوله لآخره.. بس أنا خبرت أمي: إجلسي معاه على طاولة مثل هذي و تكلمي معاه و إنت شايله الموبايل و خللي عليه الكاميرا من غير ما هو يحس. بس أمي إنحرجت و قالت : لا أنا بتكلم معاه و إنتو صوروه.. قلت لها : أنا ما راح ساويها. و أمي إختارت أختي تصور.. و أختي ردت عليها: ليش أنا يعني. و بعدها أبوي نادانا.. و قمنا من مكانا لعنده بس مادري شو سوينا.
و أتذكر و كأني في غرفتي , أمي تشوفني و أنا أقرأ القرآن و كأن عندي صورة للشخص إللي أتمنى أن أرتبط به- لكن ماحدا من أهلي يعرف عنه شي- عالموبايل و اشوف هالصورة من وقت لوقت .. و امي إبتسمت لي من غير ما تتكلم .. بس حسيت إنها حاسه فيني و عارفة شو عندي.
و أتذكر.. إني في بيتنا.. -بس ما يشبه بيتنا في الحقيقة-.. يمكن حسيته بيتي أنا .. و أنا و بنتي بس إللي نسكنه. بس جاني إتصال من بنت ما أعرفها في الواقع.. و تقوللي إن أخوها يريد يتقدم للزواج مني.. و أنا رحبت بجيتهم البيت عندي .. و جدا كنت مستغربة .. ماعرفهم.. و خبرت واحد من خوالي( هو الأكبر) و قلتله لازم من وجودك حتى تقابل الرجال.
بس أبوي و أمي عدو علينا عالبيت و تفاجأو بهالخبر.. كنا وقتها نلبس و أجهز شي فالمطبخ للتقديم.. و أبوي زعل ليش ما خبرته و مين راح يقابل الرجل. قلتله خالي يقابل الرجل.. أنا خبرته.. و عصب ليش خالي و مو هو. بس رديت عليه .. إن هو إللي طلع في بالي أخبره. و أول ما وصل خالي.. أبوي فتح له الباب و قال له: مافي داعي تكون موجود.. طبعا خالي إنحرج كثير.. بس أمي و انا تكلمنا .. و ضل خالي معانا. بس أبوي قاللي لازم عمك كمان يكون موجود (عمي أخو أبوي - جد بنتي - يعني أبو أبوها). طبعا أنا إستغربت من شرط أبوي.. و خفت الزواج ما يتم. كنت جدا خايفة.
فجأة ألاقي البنت موجودة عندي في مجلس النساء.. و كأن أبوي قال يللا على بيتي أنا و هناك نتكلم. إحراج بصراحة. و رحنا .. ولكن كأننا مارحنا... بس أشوف مجلس الرجال فيه الشخص إللي يبيني(بس ما شفت من هوي ما كان يبين جدامي) و خالي و عمي و أبوي .. و طلبو بنتي تكون موجودة معاهم. و كأن عمي يجلس بجانب الرجل المتقدم لي.. و أبي مقابل عمي في المجلس و بجانبه خالي و إبنتي أمام أبي و بجانبه و كأنها في حضنه.
و أجد أمي تقول لي إذهبي عند البنت (يعني أخت العريس).. و لكني خبرت أمي إني خايفة ما يتم الزواج و يتعرقل. قالتلي أمي: إطني كل شي بيصير تمام.. بس إنت إدعي كثير و إدعي و إدعي. و كانت مبتسمة لي.
و سمعت عمي يتكلم.. و يقول..: مادام البنوته بتكون بخير معاك.. هذا أهم شي .. و إنها تكون سعيدة.. و احسن لها إنها تكون مع أمها.. كان عمي يتكلم بجدية.. و ابوي ينظر له بإهتمام.. و يحاول يلمس الصدق و الرضى من كلامه.. و كأن كلام عمي و موافقته جدا مهمة و يريد يتأكد منه. بس لقيت الجميع راضي.
أنا تفاجأت إن عمي يقول هالكلام.. لأني كنت خايفة يرفض إن بنتي تكون معاي في هذا الزواج و تعيش معاي عند الرجل الغريب إللي بيكون بمثابة أب و هي بتناديه ((عمي)). و رحت عند البنت (إخت العريس) و الاقيها مبتسمة إبتسامة جميلة.
و أحب أذكر إن أختي ما كانت موجودة وقتها .. أنا حسيت فالحلم إنها رافضة الموضوع من أساسه و مو حابه تكون متواجدة فيه.

أنا فعلا كنت فرحانه ... بس استغرابي كان طاغي على فرحتي. و قمت من نومي و أنا مادري ليش شاغل بالي و كان ودي أكمل حتى أعرف شو بيصير معاي.. قمت من نومي الظهر عالساعة 1.. و ما رجعت للنوم بعدها.

أشكرك على مجهوداتك مع الجميع
و الله يبارك لك يا رب

هل أمك تريد أن تتعلم أو تفهم شيئاً من العلوم وطلبت منكم ذلك؟ هل تعلم أمك بمن يريد خطبتك؟

نعم.. أمي طلبت أن تتعلم شيئا في برامج الرسم (الفوتو شوب) أو شي يشبهه.. و لكني لا أعرف إلا القليل جدا و لا أستخدم هذه البرامج إلا نادا جدا جدا.. أختي هي التي تعلمها بعض الأمور في برامج الرسم.. لأن أمي أصبحت عضوة في أحد المنتديات..و كأني سمعت بأنها أصبحت مشرفة قسم.. لا أذكر.. و لكنها فعالة في المنتدى الذي تشارك فيه..و أرادت أن تعرف تقنيات الرسم.

أما عن علمها بمن أريد الإرتباط به.. فلا .. لا تعلم أي شئ.


خير

خيراً رأيت وشراً كفيت

إن صدقت رؤياك ففيها والله أعلم ما يدل على رغبة أمك في تعلم تصميم الصور وقد تبدع فيه, وربما تعرف أمك أو تحس بخبر خطبتك وتتفهم ذلك وتسهم في تسهيل أمرك ويكون لوالدك بعض الشروط ولكن عليك بالدعاء.

والله أعلم بالحق والصواب

أشكرك يا شيخ
بارك الله فيك و عطاك العافية

مرحبا يا شيخ..

حبيت أخبرك إن أمي فعلا أبدعت في تصاميم الصور.. لدرجة إني صرت أقول لها عطيني هذي الصورة و عطيني هذي الصورة حتى أحطها عندي خلفيات لموبايلي.. بصراحة واااايد حلو فعلا أبدعت ما شاء الله عليها.
هذا جزء من الحلم تحقق
بس باقي الجزء الثاني
و الله يسهل يا رب

أشكرك جزيل الشكر يا شيخ
الله يحميك و يحفظك إنت و أسرتك يا رب