بسم الله الرحمن الرحيم
الحمدلله والصلاة والسلام على نبينا محمد وعلى اله وصحبه اجمعين..
اما بعد:
السلام عليكم ورحمة الله وبركاته..
انا عندي رؤيا رأيتها ليلة البارحه او الليلة التي قبلها(ما اذكر متى بالظبط)
وهي انه اتانا سيل (سيل جارف) في الحي اللي انا اسكن فيه ومع السيل شفت شباب حارتنا يصارخون ويجرون جهة الوادي (انا قلت واحد غرق وشاله السيل وهم يبون ينقذونه) ومع الصراخ والجري اللي يجرونه يتفادون السيل عشان ماينغرقون يعني بحذر شديد جدا..
وانا جريت وراهم ابي انقذ معهم الشخص الي ضننته غرق وشاله السيل..وانا بالنسبه لي مايهمني السيل ولا علي منه يجي السيل من وراي وانا اقفز اخليه يتعداني وكل ماجات موجة سيل اقفز ماهمني السيل ولا كأنه سيل جارف يعني اختصرها لك(شجاع ماهمني السيل) المهم هدا الوضع شوي ونتقابل انا والشباب واسألهم وش اللي صار؟ قالوا والله ( صاموله او مسمار) قطعه حقت سيارة خوينا (طارق) شالها السيل وجبناها وهذي هي واطالع فيها وانها مسمار او حديده شبه طويله (من قطع السيارهـ) _في الحقيقه وليس في الرؤيا صاحبنا اللي ذكرت اسمه توهـ مشتري السيآرهـ وهي جديدهـ ماشاء الله اسمها (افالون) .
المهم وحنا نسولف عن القطعه اللي شالها السيل واخرجوها منه وبعد ماهدا الوضع شوي الا وفجأهـ يجي سيل ثاني ويجرفها ويطرد وراها اخوهـ بسيارتهم الثانيه عشان يجيبها..انتهت الرؤيا
1- الجنس(ذكر)
2- العمر(20سنه)
3- الحاله الاجتماعيه(اعزب)
4- الحاله الدينيه شبه ملتزم يعني احيان اصلي واحيان لا بس في الغالب اصلي،دخان ادخن الله يكفيني شرهـ مع العلم اني اكرهه بس وش اسوي ادمنت عليه وياما وياما حاولت اتركه،اغاني ان شاء الله نبطل منها.
5- المهنه (طالب على وشك التخرج بعد شهرين ان شاء الله من الثانويه العامه)
6- وقت الرؤيا سبق وان ذكرتها.
وشكرا لكم..
