دجاج في دولابي!

مرحبا شيخ عادل... يسعد أيامك يا رب

بياناتي:
أنا مطلقة منذ 7 سنوات تقريبا و عندي بنت بعمر طلاقي و عمري 33 سنة , مسلمة,و كنت أعمل بشكل مؤقت في مدرسة ابنتي(إدارية) أما الآن بدون عمل منذ حوالي ثلاث شهور.

حلمت اليوم ..هو حلم طويل.. بس ما أذكر غير شوي منه قبل ما أقوم.

شفت حالي بغرفة نومي و كأني أتفقد المنطقة الحساسة كيف صار حالها..( يعني جاني إحساس إني إستخدمت كريم خاص للمنطقة و كأني إستخدمته مرة أو مرتين) .. و حبيت أعرف في نتيجة أو لأ .. فكشفت على المنطقة و لقيت في تحسن جدا روووووعة حبيته من إستخدام أو إستخدامين تظهر هالنتيجة .. كنت فرحانه و نويت أستمر عليه. و بعدها دخلت بنتي غرفتي يعني جت عندي.. و مادري شو تتكلم تقول و كأنها مو راضية عن شي.. ماردي شو هو.. بس أنا خبرتها إن لازم تتسبح ألحين.. ففرحت وايد إنها بتتسبح.. و كانت تقول: ألحين بتسبح. و هي وايد فرحانه و مبتسمة. ( وجاني إحساس إني ظبطت لها الحمام بس إحساس يعني ما شفت شي صار فالحلم.. الدش شغلته ماي دافي) وإللي شفته في الحلم هو صابون الجسم مالها السائل و رجعت أشوفها .. و ألاقي إنها شايلة ملابسها .. بس ما شفت جسمها.. لأ .. كنت أشوف أكتافها مكشوفين.بس..( و حسيت إنها دخلت الحمام و بدأت تستحم و أسمع صوتها و هي مبسوطه بالماي ).
بعدها أشوف حالي كأني كنت نايمة .. و بنتي عندي فالغرفة ..- كأنها هي بعد نايمة .. ما أتذكر عدل .. بس أنا حاسه إنها موجودة بغرفتي-.. و أنا مستلقية على سريري .. أسمع في أطفال برا البيت يتكلمون في الممر إللي بينا و بين الجيران.. هذا ممر في الحارة يعني.. و قمت على الشباك حتى أشوف منو إللي يتكلم. وللا ألاقيه واحد من طلاب المدرسة إللي كنت أشتغل فيها ( إسمه عبدالله هادي-هو حاليا في الصف الرابع) كان يكلم صاحب أخوه إللي في الصف الأول الإعدادي-إللي نسميه السابع (إسمه سالم). و كان عبدالله قريب من شباكي ويطالع داخل غرفتي.. بس الشباك كان عالي عليه.. بس هو كان يحاول يشوف علامة للضوء في الغرفة في الوقت إللي كان نهار ..- يعني في الواقع أنا أحتاج أولع الضوء عندي في فترة النهار .. بسبب إن الشبابيك عليها مخفي .. هذا يخللينا ما ننكشف على برا بس نقدر نشوف إللي برا.. و لأن المخفي يسبب الظلام في غرفتي .. فأضطر إلى أن أولع الضوء عندي. عشان جيه كان عبد الله يحاول يشوف الضوء نفسه .. يعني ما راح يتمكن يشوف الغرفة و إللي فيها.. بس علامة الضوء من مصدر الضوء نفسه على السقف. فلما إقترب حتى يشوف .. ما لقى الضوء والع.. لإني أصلا توني قمت من نومي .. و قال لسالم: الليت مو والع .. معناها هي بعدها نايمة ما قامت (يقصدني) و كان زعلان..و قال: أنا أريدها تقوم تلحق على الإمتحان. أنا إستغربت .. أي إمتحان؟!..و ليش مهتم فيني و شكله زعلان إني لسه ما قمت.!! و صاحبة سالم يتكلم معاه .. بس مادري شو يقولون .. بعدها سالم إتجه لبيته و كأنه ناسي شي بيجيبه ..و عبد الله راح يكمل مشواره .. كأنه رايح المدرسة.. و كمل مشي في الممر إللي بين البيوت. بس أنا بعدت عن الشباك بعد ماراحو من عندي.. و أنا أفكر فالكلام إللي قالوه.. لأني مو فاهمة عن شو يتكلمون و ليش هو مهتم لأمري؟!!!! و أشوف بنتي تلعب فالغرفة عندي بألعابها.. و قلتلها : حبيبتي خليج هادية مابي إزعاج. ردت علي: إنزين. و كانت مستانسة و هي تلعب. و فجأة أشوف من خلال باب غرفة نومي ( يعني باب غرفتي مفتوح كامل ) إن خالي جمال عندها .. و دخل معاه أغراض للمطبخ .. أمي كانت في المطبخ. ( بس تفصيل البيت إني أشوف الممر و المطبخ يمين الممر .. هذا مو موجود فالواقع .. مو نفس تفصيل البيت ) المهم.. دق جرس الباب و خالي راح يفتح.. و كأنه عبدالله هو إللي دق الباب..و كلم خالي و كأنه يقول له إنه يذكرني بالإمتحان حتى لا يفوتني و هو مايباني أرسب. بصراحة بعدني مستغربة من هالكلام.. مو فاهمة شي. و رد عليه خالي بالإيجاب. و سكر الباب. و دخل خالي المطبخ.. و أشوفه و هو طالع من المطبخ و يمشي في الممر بإتجاهي.. في إيديه الثنتين كم حبة دجاج مثلج من الفريزر و كلهم كبار في الحجم ( و كأنه في 5 حبات في يد و اليد الثانية فيها 5 أو 4 المهم هم كثار و ثقال و كبار.. يبان على شكل خالي إنهم ثقال نوعا ما عليه بس متمكن من حملهم – خالي قوي بالرغم من إنه ضعيف نوعا ما .. هو مدرب في الشرطة .. يعني يدرب على عمليات الشرطة في القبض على المجرمين بالحركات ).. يعني عمري ما شفت دجاج بهالحجم يمكن كأنه ديك رومي مو دجاج .. و خالي حليله شايل عدد كبير منهم في إيديه و جايني على غرفتي .. و قاللي: ترا هذيل حقج إنت .. خلليهم عندج. قلتله: إنزين .. و فتحت دولاب ملابسنا أنا و بنتي .. فردة وحدة بس و كنت أفكر .. إن دولابي مليان ملابس وين أحط هالدجاج و كيف.. وللا أشوف الدولاب من داخل صار شكله مثل الفريزر و براده حلو و صرت أصف الدجاج داخله.لأن خالي حطهم عندي على الأرض و أنا صرت اشيلهم و أدخلهم الفريزر مالي .. و ألاقي إن في كيسين حجم وسط لحم مفروم.. أنا إحساسي إنه دجاج مفروم .. بس بصراحة لونه أحمر و كأنه مال لحم مفروم .. مب دجاج.. بس هذا كان إحساسي.إنه دجاج مفروم و رتبته بالطريقة إللي أحب داخل الدولاب فريزر.

بعدها قمت من نومي .. و أنا في بالي أسئلة وايد .... طبعا كل الحلم علامة إستفهام عودة عندي.

أنتظر تفسيرك بفارغ الصبر يا شيخ عادل .. و إن شاء الله ربنا يسهل أمورك كلها و يبارك لك جميع أعمالك يا رب.

ربي يسهل أمورك و يقويك يا شيخ عادل