السلام عليكم ورحمة الله وبركاته..
يا شيخ عندي حلم واتمنى منك تفسره الله يجزاك خير..
اسمي عواطف , ومخطوبة ( فترة ما بعد الملكة ) وعمري 24 سنه. زوجي اسمه محمد عمره 26 وهو مبتعث في الخارج للدراسه.
من فتره كنت أحلم احلام مخيفه. منها 3 احلام عن زوجي..
انا لي اسبوع تقريبا او اكثر اشغل قرآن ( الرقية الشرعية للسديس والعفاسي ) قبل انام.
واخليها تشتغل وانا نايمه..
قبل 4 ايام كلمت زوجي يشغل الرقيه هذي قبل ينام..
أمس حلمت اني كنت بسياره بيضاء صغيره .. وكان وراي جمس جديد لونه ذهبي وكان على يمين الجمس سياره بيضاء فيها 4 اولاد ما شفت اشكالهم
جاء رجال وفك النور الاصفر اللي قدام من جهه اليسار بس من انوار الجمس ..
جاء يبي يفك نور سيارتنا اللي راكبين فيها ومنعه رجال يقرب لي اسمه احمد
انا ارتحت بس العيال اللي معرفهم في السياره البيضاء جلسوو يهددوني ...
انا في خاطري ادري انهم مو انس وادري انهم يقصدون زوجي بس طنشت
اول ما وصلت البيت دقيت على الشرطه وقلت في واحد جالس يسرق جمس قالي اصلا اللي داخل الجمس مات
قلت انا بلغتك وبرءت ذمتي لله انت لو سكت الذنب عليك
رجعو العيال يصيحووون بصوت عالي قالو والله ما نخليك والله نقتلك ليييه تعلمييه وكانهم معصبين مره
وقمت من النوم مفجوعه وتعوذت من الشيطان
ورجعت نمت وشفت رجال لابس زي سعودي .. ومسك بنطلون قطن لونه رمادي وثني الرجل البنطلون على الفخذ ودبسه بدبابيس اوراق
واشر باصابعه قال هذي خمس حروف (م ف ر ق ه)
وانتهى الحلم
------
امس بالليل زوجي يقول كان مشغل القران ونام..
وحلم حلم راح اكتبه لك ياشيخ..
يقول الحلم طويل وما يتذكر الا آخره.
يقول كان في بيت وكانت في قطوه واقفه عند الباب لونها رمادي غامق او بني غامق.
كأنها مريضه. وجات وحده كأنها من الشرطه او شئ زي كذا تشوف وش فيها
وسألت زوجي عن اسم القطوه.. قال زوجي ما اعرف.
يقول هو كأنه واقف ورا القطوه ومد يده ومسك ظهرها
وتلتفت فيه القطوه. وتصيح عليه وواضح انها زعلانه او معصبه
هو يقول فهم انها تقول ان زوجي يعرف اسم القطوه. ويقول قالت اسم بس مو متذكره زين. لأنه غريب.
والقطوه باقي كأنها زعلانه وكأنها تبي تنقز على زوجي
بس نقزت من فوقه وقام من النوم..
جزاك الله خير ياشيخ