السلام عليكم ورحمة الله
ملتزمة , غير موظفة , غير متزوجة , الحلم قبل يومين , في الصباح تقريبا الساعة 10
والغريب في الحلم اني صحيت ورجعت احلمه مره ثانية , وتكمله له
حلمت اني دخلت مكان انا وبنت معي , وشفت صديقة لي جالسة تسولف مع وحدة , وكنت اقول في نفسي طال شعرها ( في الواقع شعرها قصير ) وكان في الحلم اطول من الواقع بشوي ولكن واضح الفرق ,, المهم وانا ماشية قربت من البنت اللي معاي , لأني عارفة ان صديقتي جالسة تطالعنا واحنا مقفين ,, ورحنا مكان ,, وشوي جت صديقتي وواضح الغضب بداخلها وهي صامتة وجت مسكت البنت اللي معي وتحاول تبعدها عني , لدرجة خفت تتصرف تصرف جنوني , وبعدين قلت للبنت اللي معي خلاص روحي , وبعدين صارت صديقتي معي ,, ورحنا مكان وجت اشترت لي ولها رز ودجاج ,, ورحت انا البيت عشان اروح اجيب فلوس ادفع معها ( في نفسي استحي لازم ادفع ) ودخلت البيت ولقيت بوك قديم لأختي وبداخله ( 50 ريال ) وجت اختي وخبرتها ,, وبعدين صارت الــ 50 ) 100 ورحت غرفتي وادور بلايز عند اختي وحذاء وشنطة عشان لما اقابل صديقتي , وجت اختي قالت عندي بلايز من قبل بس ما احد شافها قلت عادي , وظليت اجرب وطولت شوي وانا اجرب , لأن كل شوي مايعجبني شي وفي الاخير لقيت شنطة عند اختي حلوة ,, وسالت اختي الكبيرة واعجبتها , لانها كانت معنا في الغرفة ,, وجاء اخوي الكبير اسمه احمد يسولف معنا ,, وخفت يسالني ليش اروح ,, لاني بروح عشان صديقتي ,, ولكن ما سألني ,, وحسيت اني طولت على صديقتي صار الوقت تقريبا 3 العصر وجيت بطلع واشوف مع شباك غرفتي مطر ورعد وصار كأننا في المغرب ,, وخفت من الجو , وقلت ماعاد بروح وشوي طلع الجو اللي شفته مو عندنا او انه مو حقيقي طلع كأنه في قناة ,, وجاء الليل وكان في مقطع صوتي مرسلته صديقتي كان في الحلم واضح ولكن الحين مااذكره ,, وكنت انا جالسة في صالة في بيتنا بس طالع بيتنا مختلف كأننا معزلين يعني مافيه الا التلفزيون وكنب قليل ( احنا في الواقع ببنقل من بيتنا هذا بعد اشهر بأذن الله )اكتب لها وفرحانة من داخلي , اني اقدر ارسل لها بأي وقت مو مثل قبل ,, وانا ماسكة الورقه واشوف اش اكتب لها قلت في نفسي (مثل التذكير البسيط لنفسي لو انها فلانة وحدة ثانية من البنات ماكان انشغلتي ,, فيها مثل هالبنت )وجلست استغفر ورا بعض (يعني اني بظل على عهدي مع الله وعلاقتي به ماراح اي شي يغيرني ) وبعدين جيت اكتب لها وجاء اتصال وحدة كانت تكلم امي في موضوع الله اعلم ولكن حسيت كأنه خطبة , وقالت امي للحرمة خير ان شاء الله مع انه ماوضح في الحلم من هي الحرمة ,, وكانت امي لما تكلمها حريم اخواني منتبهين وكنت اريد اي شي يشغلهم عشان ماينتبهون للمكالمة ,وبعدين صرت في غرفة امي وكنت احاول اكتب رقم صديقتي هذي بس الأرقام الاخيرة من الرقم غلط تكون رقم وحدة من البنات واحاول كذا مرة واهلي من حولي مسوين ازعاج , وجاء اليوم الثاني ودقيت على بيت صديقتي بعد عدة محاولات لأني اغلط بالرقم وبعدين ردت امها , قلت وين فلانة قالت نايمة , قلت خلاص ,, قالت بروح اصحيها قلت انا ايه بالمرة عشان صلاة الظهر ,, لانه بالحلم دخل وقت صلاة الظهر ,, وانتهى الحلم وقمت من النوم فرحانة.
ملاحظة / انا وصديقتي هذي في الواقع مفترقين تقريبا 6 سنوات بسبب خلافات بيني وبينها مثل ما نذكر في الحلم واكون انا السبب ,, وانا ادعوا الله ان يصلح بيني وبينها ، لانها تملك قلب طيب ووفي لأخر حد , وانا ندمانة اني خسرتها ودعوت الله ان يريني فيها رؤيا صادقة عن علاقتنا هل فيها صلح يعني كنت اريد من الله التوضيح ,, وبعدها بيوم اراني الله هذي الرؤيا
اسأل الله لمن يفسرها لي ان يرزقه الجنة بلا حساب ولا سابق عذاب .. وبارك الله في الجميع
